Bombardimet kundër Iranit, Izraelit dhe shteteve përreth vazhdojnë të enjten, mes pasigurisë rreth bisedimeve të mundshme paqeje midis SHBA-së dhe Teheranit.
Pentagoni tha se ka arritur marrëveshje me kontraktorë amerikanë për të rritur rezervat e municioneve, përfshirë pjesë për raketa të sistemit THAAD, të cilat përdoren në luftën në Lindjen e Mesme.
Presidenti amerikan Donald Trump u shpreh para ligjvënësve republikanë se Irani po merr pjesë në bisedime, pavarësisht mohimeve. "Ata po negociojnë dhe duan shumë të bëjnë marrëveshje, por kanë frikë ta thonë", tha ai. Trump shtoi se Irani është pajtuar të mos zhvillojë kurrë armë bërthamore dhe premtoi se do t’ia bëjë "jetën ferr" nëse nuk pranon marrëveshjen.
Planet për paqe
Plani i SHBA-së përmban 15 pika, ndërsa ai i Iranit vetëm 5, por secili shkel kushtet e palës tjetër. Hollësitë e planit amerikan nuk janë bërë publike, por besohet se është i ngjashëm me propozimet e mëparshme, të dorëzuara përmes Pakistanit më 24 mars. Zëdhënësja e Shtëpisë së Bardhë, Karoline Leavitt, konfirmoi se raportimet për 15 pikat përmbajnë elemente të së vërtetës.
Elemente të reja përfshijnë kërkesa për Ngushticën e Hormuzit, të cilën Irani e mban të bllokuar. Trump vendosi një ultimatum 48-orësh më 21 mars për hapjen e saj, të cilin e zgjati me 5 ditë.
Reagimet e Iranit
Ministri i Jashtëm iranian Abbas Araghchi tha se Irani nuk ka ndërmend të negociojë për momentin dhe do të vazhdojë të mbrohet. Teherani paraqiti 5 kushte, duke kërkuar përfundimin e konfliktit në të gjitha frontet dhe pagesën e dëmeve. Raportet tregojnë se Irani ka vendosur mina dhe forca ushtarake në ishullin Kharg, që menaxhon 90% të eksporteve të naftës, në pritje të një operacioni amerikan.
Lufta filloi me sulmet ajrore izraelite dhe amerikane më 28 shkurt, pas një konflikti të mëparshëm në qershor të vitit të kaluar. Udhëheqja e re iranian, me Mojtaba Khamenei si udhëheqës suprem të emëruar më 8 mars, përballet me vështirësi komunikimi për shkak të bombardimeve.