Pas mbledhjes së zhvilluar në datën 13 Qershor 2026, Bordi i Transparencës ka shpallur çmimet e reja tavan për shitjen e nënprodukteve të naftës në tregun vendas. Sipas vendimit, çmimi i naftës (gazoil i standardit SSH EN 590) për pakicë është vendosur në 183 lekë/litri, ndërsa çmimi i shitjes me shumicë është përcaktuar në 171 lekë/litër.
Sa i përket benzinës së standardit SSH EN, çmimi i shitjes me pakicë është vendosur në 170 lekë/litri, ndërsa për shitjen me shumicë çmimi tavan është 158 lekë/litër. Këto ndryshime kanë hyrë në fuqi ditën e sotme, duke filluar nga ora 14:00.
Bordi i Transparencës ka njoftuar operatorët e tregut se zbatimi i këtyre çmimeve është i detyrueshëm. Çdo shkelje e konstatuar do të pasohet me pezullimin e aktivitetit të subjektit përkatës. Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë kanë deklaruar angazhimin e tyre për monitorimin e tregut dhe mbrojtjen e interesave të konsumatorëve.
Në sqarimin zyrtar theksohet se, bazuar në Aktin Normativ nr. 1, datë 3.4.2026, çmimet janë nën nivelet kufi prej 220 lekë/litri për gazoilin dhe 200 lekë/litri për benzinën. Për rrjedhojë, niveli i akcizës do të zbatohet i plotë, në masën 100%.