Banka Qendrore e Republikës së Kosovës (BQK) ka nxjerrë një njoftim ku rikujton hyrjen në fuqi të Rregullores për Licencimin e Operatorëve të Shërbimeve të Kripto-Aseteve me aktivitet këmbimi më 29 nëntor 2025. Kjo rregullore shënon hapin e parë drejt rregullimit gradual të këtij sektori dhe rritjes së transparencës në Kosovë.
Subjektet që ofrojnë shërbime të tilla, përfshirë këmbimin e kripto-asetëve me para fiat ose kripto-asete të tjera, janë të detyruara të aplikojnë për licencë dhe të përshtaten plotësisht me kërkesat brenda një afati prej 90 ditësh, pra deri më 1 mars 2026. Ky është afati i fundit për dorëzimin e aplikacioneve gjatë periudhës kalimtare.
Pas 1 mars 2026, ushtrimi i veprimtarisë pa licencë të BQK-së ose në mospërputhje me kërkesat rregullative do të konsiderohet shkelje e dispozitave të rregullores dhe do të trajtohet sipas legjislacionit në fuqi. Rregullorja bazohet në Ligjin Nr. 08/L-295 për Kripto-Asete dhe është në përputhje me Rregulloren e Bashkimit Evropian për Tregjet e Kripto-Aseteve (MiCA).
Kriteret kryesore për licencim përfshijnë:
- Kërkesat për kapital minimal dhe qeverisje korporative;
- Ruajtjen e fondeve të klientëve;
- Masat kundër pastrimit të parave dhe financimit të terrorizmit;
- Detyrimin për transparencë, profesionalizëm dhe raportim të saktë financiar.
BQK inkurajon palët e interesuara të përmbushin detyrimet brenda afateve për të siguruar zbatim të plotë të kornizës rregullative dhe funksionim të qëndrueshëm të sektorit. Ky njoftim pason atë të datës 25 shtator 2025 për miratimin e rregullores.