Në mbledhjen e datës 2 tetor 2026, Këshilli i Ministrave miratoi projektligjin “Për Tregjet e Kripto-Aseteve”, një dokument i hartuar nga Autoriteti i Mbikëqyrjes Financiare (AMF). Projektligji synon transpozimin në legjislacionin vendas të Rregullores së Bashkimit Evropian 2023/1114, e njohur si MiCA, duke krijuar një kuadër të plotë rregullator për këtë sektor.
Sipas AMF-së, ndërhyrja ligjore adreson nevojën për standardizimin e shërbimeve si platformat e tregtimit, shërbimet e kujdestarisë, këmbimi, ekzekutimi i urdhrave dhe administrimi i portofoleve. Për operatorët, dokumenti përcakton kërkesa të detajuara për kapitalin minimal, qeverisjen korporative, sigurinë kibernetike dhe menaxhimin e konflikteve të interesit. Gjithashtu, vendosen mekanizma rigorozë për parandalimin e abuzimit me tregun dhe luftën kundër pastrimit të parave.
Projektligji parashikon një regjim të diferencuar rregullator, i cili trajton kategoritë e ndryshme të kripto-aseteve bazuar në natyrën, funksionin ekonomik dhe shkallën e rrezikut. Ky hap shënon tranzicionin e Shqipërisë drejt një sistemi të harmonizuar plotësisht me standardet e Bashkimit Evropian.
Mbikëqyrja e konglomerateve financiare
Krahas këtij akti, Qeveria miratoi edhe projektligjin “Për mbikëqyrjen shtesë të institucioneve të kreditit, shoqërive të sigurimeve dhe shoqërive komisionere, pjesë e konglomerateve financiare”. Ky projektligj, i mbështetur në Direktivën 2002/87/EC (FICOD), synon forcimin e mbikëqyrjes prudenciale për grupet financiare ndërsektoriale. Përmes bashkëpunimit mes Autoritetit të Mbikëqyrjes Financiare dhe Bankës së Shqipërisë, synohet shmangia e përdorimit të dyfishtë të kapitalit dhe kontrolli më i mirë i përqendrimit të rrezikut brenda grupeve financiare.