Deputeti i Partisë Socialiste Erion Braçe deklaroi në Kuvend se për vitin 2025 importi i hidrokarbureve në Shqipëri ka qenë rreth 609 milionë kilogramë, ose afërsisht 700 milionë litra. Ndërkohë, rieksporti drejt Kosovës ka arritur në 731 milionë litra, prej të cilëve gati një e treta është realizuar nga një kompani e vetme.
Braçe shprehu dyshime të forta se kjo naftë nuk shpërndahet në tregun kosovar, por tregtohet brenda Shqipërisë. Ai e cilësoi si histori kontrabande midis të dy vendeve, ku dyshohet se janë përfshirë zyrtarë nga Shqipëria dhe Kosova, në bashkëpunim me operatorë privatë.
Sipas tij, kontrabanda ndikon drejtpërdrejt në mbajtjen e çmimeve të larta të karburanteve në Shqipëri. Çmimet e ulëta, argumentoi Braçe, nuk krijojnë interes për kontrabandë.
Deputeti socialist u përgjigj kështu akuzave të ish-kryeministrit Sali Berisha se mbron interesat e tregtarëve. Ai theksoi se askush nuk flet për këtë çështje për të mos cenuar të përfshirët.
Braçe kërkoi që institucionet fiskale të adresojnë problemin dhe të japin një goditje përfundimtare kontrabandës.