Drejtuesi i Prokurorisë së Posaçme kundër Korrupsionit dhe Krimit të Organizuar, Klodian Braho, raportoi këtë të premte para Komisionit për Çështjet Ligjore dhe Administratën Publike. Diskutimi u fokusua te marrëdhënia mes SPAK dhe Policisë së Shtetit, pas pyetjeve të deputetit socialist Erjo Mile lidhur me operacionet e Byrosë Kombëtare të Hetimit (BKH) në terren pa asistencën e policisë, siç ishte rasti i Adi Çobës në Durrës.
Braho theksoi se Policia e Shtetit mbetet një partner i pazëvendësueshëm dhe se referimet e dërguara prej saj janë rritur gjatë këtij viti. Ai sqaroi se operacionet e pavarura të BKH-së nuk burojnë nga mosbesimi, por janë veprime procedurale të mbështetura nga ligji, të cilat i lejojnë strukturës të përmbushë detyrat e saj.
Kreu i SPAK nënvizoi domosdoshmërinë e krijimit të një infrastrukture të dedikuar operacionale dhe taktike, e cila do të mundësonte që BKH të mos varet nga institucionet e tjera për kryerjen e hetimeve. Sipas tij, ky model i pavarësisë së plotë përputhet me praktikat e institucioneve homologe ndërkombëtare, duke lejuar strukturën që të përmbyllë e vetme ciklin e plotë të veprimeve hetimore për çështje të caktuara.
Përditësime
Kreu i BKH-së, Aida Hajnaj, kërkon autonomi më të madhe operacionale për të luftuar format komplekse të krimit të organizuar, si përdorimi i fondeve offshore dhe rrjetet ndërkombëtare kriminale. Duke iu referuar deklaratave të Braho, theksohet nevoja për pavarësi hetimore për shkak të dyshimeve mbi integritetin e elementëve brenda Polocisë së Shtetit. Braho kërkon një angazhim më intensiv nga Policia e Shtetit, duke tejkaluar format e deritanishme të bashkëpunimit.