Prokuroria e Posaçme Kundër Korrupsionit dhe Krimit të Organizuar (SPAK) ka propozuar krijimin e një njësie operative brenda Byrosë Kombëtare të Hetimit (BKH). Kjo njësi do të ketë aftësi për të vëzhguar dhe infiltruar në hetime në mënyrë të fshehtë (undercover).
Plani synon të sigurojë pavarësi të plotë të hetuesve të BKH nga Policia e Shtetit, tek e cila ata vazhdojnë të mbështeten që nga krijimi i byrosë. Ky propozim paraqitet në raportin vjetor të SPAK, jo shumë larg nga koha kur prokuroria ka ankuar për dekonspirim dhe tradhti në aksione hetimore të dështuar.
SPAK deklaron se "ngrritja e një njësie të tillë brenda strukturës do të kufizojë maksimalisht edhe mundësinë e rrjedhjes së informacioneve gjatë veprimeve hetimore, si dhe do të zhvillojë një dimension tjetër të kapaciteteve hetimore".
Nga hapja e BKH sipas modelit të FBI-së amerikane, byroja ka marrë në dorë përgjimet dhe, së fundmi, njësinë parandaluese. Megjithatë, njësia e vlerësimit të riskut mbetet ende jo funksionale, pavarësisht kërkesave të përsëritura të ish-drejtoreshës së BKH.
Në godinën e re ku pritet të zhvendoset BKH, çdo zyrë marrjeje në pyetje është pajisur me sisteme kamerash dhe regjistrimi audio. Këto garantojnë monitorim dhe dokumentim të plotë gjatë pyetjeve të deklaruesve dhe dëshmitarëve, sipas urdhrave të prokurorëve të posaçëm.