Autoriteti Rrugor Shqiptar (ARRSH) ka bërë të ditur zhvillimin e një procesi pune me eksploziv për qëllime infrastrukturore në aksin rrugor të Bypass-it të Sarandës. Shpërthimi i kontrolluar është planifikuar të realizohet në afërsi të guroreve Volloder, pranë fshatit Shën Vasil.
Sipas njoftimit zyrtar, ndërhyrja do të zhvillohet në harkun kohor prej një ore, nga ora 09:00 deri në orën 10:00. Ky proces është pjesë e projektit për hapjen e trasesë së re rrugore dhe do të përdoren sasi të vogla eksplozivi.
Në bashkëpunim me strukturat e Polisë së Shtetit, autoritetet kanë marrë masat e nevojshme për menaxhimin e trafikut dhe garantimin e sigurisë për qytetarët dhe drejtuesit e mjeteve. ARRSH kërkon mirëkuptimin e përdoruesve të rrugës dhe u bën thirrje drejtuesve të mjeteve të tregojnë kujdes të shtuar, duke respektuar sinjalistikën e përkohshme dhe udhëzimet e punonjësve të policisë deri në përfundimin e plotë të këtij procesi.