Autoriteti Rrugor Shqiptar (ARRSH) ka njoftuar se ditën e premte, më 3 korrik 2026, do të zhvillohet një shpërthim i kontrolluar në kantierin e bajpasit të Sarandës. Procesi, i cili do të kryhet me sasi të vogla eksplozivi për hapjen e trasesë së rrugës, është planifikuar pranë fshatit Shën Vasil, në afërsi të guroreve Volloder.
Sipas njoftimit zyrtar, punimet do të zhvillohen në harkun kohor nga ora 16:00 deri në 17:00. Për mbarëvajtjen e këtij operacioni, ARRSH ka bashkërenduar masat me strukturat e Policisë së Shtetit.
Efektivët e policisë do të angazhohen në terren për menaxhimin e trafikut dhe garantimin e sigurisë së qarkullimit gjatë orarit të shpërthimeve. Autoritetet u kanë bërë thirrje drejtuesve të automjeteve dhe qytetarëve që të tregojnë mirëkuptim dhe të zbatojnë me përpikëri sinjalistikën dhe udhëzimet deri në përfundimin e plotë të punimeve.
Përditësime
Autoritetet kanë ndryshuar orarin e shpërthimeve të kontrolluara në bajpasin e Sarandës për ditën e sotme. Operacioni do të kryhet në fashën orare 09:00-10:00, duke zëvendësuar njoftimin e mëparshëm për orën 16:00-17:00.