Skuadra e Cagliarit në Serie A po vlerëson mundësinë e transferimit të Armando Brojës për të përforcuar repartin e sulmit. Interesimi i klubit sard, ku aktivizohet edhe portieri i Shqipërisë Alen Sherri, është konfirmuar nga raportimet e gazetarit Gianluca Di Marzio.
Drejtuesit e Cagliarit e shohin 24-vjeçarin si profilin ideal për shkak të karakteristikave fizike dhe teknike që përshtaten me lojën e skuadrës. Armando Broja, i formuar në akademinë e Chelsea-t, po kërkon një aventurë të re pas rënies së Burnley-t nga kategoria në Angli. Edhe pse statistikat e tij në sezonin e fundit në Premier League ishin modeste, klubi italian shprehet optimist se mund ta rikthejë lojtarin në formën e tij më të mirë. Në të kaluarën, emri i Brojës ka qenë subjekt i interesimit nga klube të tjera italiane, si Milani dhe Lazio.
Ndërkohë, klubi i Cagliarit mbetet aktiv në merkato edhe për afrime të tjera. Skuadra ka mbyllur marrëveshjen për talentin e Everton U18, Demi Akarakiri, i cili pritet t'i nënshtrohet vizitave mjekësore ditën e enjte. Pritet që në javët në vijim të ketë zhvillime të mëtejshme nëse klubi italian do të bëjë një ofertë konkrete për sulmuesin shqiptar.