E ardhmja e sulmuesit të Kombëtares shqiptare, Armando Broja, duket se do të jetë larg skuadrës së Burnley, pasi largimi i tij vlerësohet si një lëvizje e pashmangshme. West Ham ka rikthyer interesin për lojtarin, duke nisur bisedimet zyrtare me drejtuesit e Burnley për të siguruar shërbimet e tij.
Sipas raportimeve nga Anglia, negociatat ndodhen ende në fazat fillestare. Për të lehtësuar këtë operacion, klubi londinez po shqyrton mundësinë e përfshirjes së mbrojtësit të ri Ollie Scarles si pjesë e këmbimit. Interesimi i West Ham për Armando Brojën nuk është i ri, pasi klubi e ka ndjekur futbollistin prej vitesh dhe ka tentuar transferimin e tij edhe në të kaluarën.
Ndryshe nga sezonet e mëparshme, West Ham do të militonte në Championship për sezonin e ri dhe e sheh Armando Brojën si një element kyç për të udhëhequr fazën ofensive drejt objektivit për rikthim të menjëhershëm në Premier League. Nga ana tjetër, situata po monitorohet me kujdes edhe nga klubi italian i Lazio, i cili mund të ndërhyjë në garë nëse bisedimet mes palëve angleze nuk shënojnë përparim.
Sulmuesi 24-vjeçar synon një kthesë në karrierën e tij për të rifituar vëmendjen e humbur gjatë kohës së fundit, pas një periudhe nën pritshmëritë në klubin aktual. Tashmë pritet të shihet se cili do të jetë destinacioni i radhës për futbollistin, ndërsa negociatat vijojnë të zhvillohen në prapaskenë.