Eugen Cakolli nga Instituti Demokratik i Kosovës (KDI) ka kërkuar nga Prokuroria nisjen e menjëhershme të hetimeve dhe ndjekjeve penale për dyshimet e manipulimit të votave të kandidatëve për deputetë.
Sipas tij, manipulimet e evidentuara pas rinumërimit në disa vendvotime dhe komuna kanë marrë përmasa industriale dhe nuk mund të shpjegohen si gabime njerëzore apo rastësi. “Ku është dhe çka po pret Prokuroria që nuk po nisë hetimet dhe ndjekjet penale për manipulimin e votave të kandidatëve – që në disa vendvotime e komuna kanë marrë përmasa industriale”, ka shkruar Cakolli në një reagim publik në Facebook më 18 janar 2026.
Ai thekson se emrat e komisionerëve për secilën tavolinë numërimi në Qendrat Komunale të Numërimit (QKN) dihen, por manipulimet nuk janë kryer vetëm nga këta. “Dhjetëra e qindra vota të shtrembëruara në një vendvotim të vetëm, e mijëra në nivel komune – kryesisht për kandidatë të caktuar dhe në komunat e tyre – nuk janë as rastësi, as gabim njerëzor”, ka shtuar ai.
Cakolli vlerëson se përfshirja e kandidatëve të caktuar në këto skema është e mundshme dhe apelon që hetimet t’i përfshijnë edhe ata, për të mbrojtur integritetin e procesit zgjedhor dhe besimin e qytetarëve.
Përditësime
KQZ ka urdhëruar rinumërimin në mbi 900 vendvotime. Mospërputhjet më të mëdha u regjistruan në Prizren: PDK +19 mijë vota, LDK +4.500 vota, VV +3.100 vota për kandidatë brenda partive, sipas KQZ-së.
Kryeprokurori i Prizrenit, Petrit Kryeziu, ka autorizuar Policinë për të identifikuar përgjegjësit, siguruar prova dhe nënshkrime. Ai deklaroi përgjegjësi penale për falsifikim votash.