Procesi i rinumërimit të votave në Kosovë ka zbuluar ndryshime të mëdha në numrin e votave të disa kandidatëve për deputetë brenda rezultateve të partive, në raport me rezultatet e nxjerra në Qendrat Komunale të Numërimit.
Juristët kanë përjashtuar mundësinë e gabimeve njerëzore për rastet ku dallimet arrijnë dhjetëra, qindra apo mijëra vota. Ata vlerësojnë se këto raste përbëjnë lëndë për Prokurorinë mbi bazën e dyshimeve për kryerjen e veprës penale të falsifikimit të rezultateve të votimit, të paraparë në Nenin 216 të Kodit Penal, me dënime nga një deri në tre vjet burg.
Avokati Arbër Jashari pranon hapësirë për gabime njerëzore e teknike në numërime, por thekson se rinumërimi tregon një tendencë të qartë manipulimi të rezultateve në favor të disa kandidatëve. "Konsideroj se është normale që aty ku punohet edhe mund të gabohet, sidomos kur kemi të bëjmë me shifra dhe numërime të votave, por gabimet që po dalin në pah tash me rastin e një rinumërimi të votave po shihet që ka një tendencë të qartë të manipulimit të rezultateve të votimit në favor të disa kandidatëve për deputetë", ka deklaruar ai.
Avokati Visar Rrecaj ka quajtur dallimet e mëdha, si plus-minus 1900 vota për një kandidat, si vjedhje dhe vepër penale. "Gabimi njerëzor me një, me dy, me pesë, hajde edhe me dhjetë në nivel vendi, kur kemi me i numërua 1 milion fletëvotime. Mirëpo, fletëvotimet për një kandidatë që shkojnë plus-minus 1900 aty nuk ka më gabim, aty ka vjedhje. [...] Prokuroria e Shtetit qysh në ditën kur ka dalë kjo diskrepancë, ka qenë dashtë të shkojë në atë vendvotim dhe të urdhërojë arrestimin e të gjithë atyre që kanë numëruar vota aty", ka thënë Rrecaj.
Ndryshimet variojnë nga disa vota në dhjetëra, qindra e mijëra, sipas raportimeve nga rinumërimi i deritanishëm.