Në Pejë pritet të dorëzohen 31 kallëzime penale ndaj mbi 200 personave, të dyshuar për falsifikim dhe manipulim të rezultateve zgjedhore për kandidatët për deputetë në zgjedhjet e 28 dhjetorit.
Zëdhënësi i Prokurorisë Themelore në Pejë, Shkodran Nikçi, e ka konfirmuar këtë për media të ndryshme, duke theksuar se rastet lidhen me ndërhyrje në procesin e numërimit dhe evidentimit të votave.
Të dyshuarit përfshijnë kryesues dhe komisionerë të përfshirë në procesin zgjedhor. Hetimet janë zhvilluar për dyshime keqpërdorimesh gjatë administrimit të votave, ndërsa autoritetet ndodhen në fazën e procedimit të rasteve.
Ndryshe, raste të ngjashme për manipulim votash janë raportuar më herët në këtë komunë, duke ngritur shqetësime për integritetin e procesit zgjedhor.
Përditësime
Policia e Kosovës arrestoi 10 persona (7 mashkuj dhe 3 femra) më 30 dhjetor në Pejë për falsifikim rezultati zgjedhor dhe depozitoi kallëzimet penale në Prokurori.
Hetimet i autorizoi kryeprokurorja Lumturije Vuçetaj më 19 janar.
Arrestime të ngjashme ndaj komisionerëve u kryen në Prizren, Malishevë, Gjakovë dhe Drenas.
Këta 10 persona u shoqëruan së fundmi nga policia dhe u liruan në procedurë të rregullt.