Prokuroria pranë Gjykatës së Shkallës së Parë të Juridiksionit të Përgjithshëm Elbasan ka njoftuar vendosjen e masave të sigurisë ndaj tre ish-zyrtarëve, të cilët janë nën hetim për veprën penale të shtrëngimit me dhunë për dhënie pasurie, e kryer në bashkëpunim.
Hetimet për këtë çështje, të regjistruara nën procedimin penal nr. 238, datë 02.03.2026, kanë nisur pas referimit të materialeve nga Prokuroria e Posaçme Kundër Korrupsionit dhe Krimit të Organizuar (SPAK). Sipas organit të akuzës, të dyshuarit G.A. (Drejtor i AMP-së), K.H. (Oficer i Policisë Gjyqësore) dhe D.A. (Drejtor i Policisë Bashkiake), kanë shfrytëzuar funksionet e tyre për të ushtruar presion ndaj shtetasit A.B., administrator i një subjekti tregtar.
Në bazë të hetimeve paraprake, qëllimi i këtyre veprimeve ka qenë marrja në mënyrë të padrejtë e pasurisë së shtetasit A.B., në këmbim të moskryerjes së kontrolleve administrative ndaj biznesit të tij. Prokuroria ka theksuar se këto veprime cenojnë rëndë marrëdhëniet juridike që garantojnë lirinë e individit dhe mbrojtjen e pronës private.
Aktualisht, çështja po hetohet me përparësi në bashkëpunim me shërbimet e policisë gjyqësore të Agjencisë së Mbikëqyrjes Policore. Organi i akuzës vijon dokumentimin e plotë të veprimtarisë së dyshuar kriminale të personave nën hetim.