Agjencia e Mbikëqyrjes Policore (AMP) ka vënë në zbatim vendimet e gjykatës për caktimin e masave të sigurimit ndaj tre shtetasve, në kuadër të një procedimi penal që ndiqet nga Prokuroria pranë Gjykatës së Shkallës së Parë të Juridiksionit të Përgjithshëm Elbasan. Hetimet ndaj ish-zyrtarëve kanë nisur rreth tri vite më parë, ndërsa akuza zyrtare është ajo e shpërdorimit të detyrës.
Sipas vendimit gjyqësor, masat e caktuara janë:
- Glodian Gëzim Ahmetaj: masa e sigurimit "ndalim i daljes jashtë shtetit", me detyrimin për të dorëzuar dokumentet e udhëtimit.
- Klevis Ramadan Hoxha: masat "paraqitje në policinë gjyqësore" dhe "ndalim i daljes jashtë shtetit", me detyrimin për t'u paraqitur javën e parë të çdo muaji, të hënën, ora 11:00.
- Devis Ramadan Ago: masa "paraqitje në policinë gjyqësore", me detyrimin për t'u paraqitur javën e parë të çdo muaji, të hënën, ora 12:00.
Në zbatim të operacionit, autoritetet kanë ushtruar kontrolle në tri banesa, me qëllim administrimin e provave materiale. Burime nga grupi hetimor bëjnë me dije se ish-zyrtarët, gjatë kohës që shërbenin në degën e AMP-së në Devoll, dyshohet se kanë shfrytëzuar persona të tjerë për të lejuar kontrabandën e mallrave kundrejt përfitimeve financiare.
AMP deklaroi përmes një njoftimi zyrtar se është e përkushtuar në zbatimin e ligjit dhe garantimin e paanshmërisë në proceset hetimore, duke theksuar se askush nuk është mbi ligjin.
Përditësime
Prokuroria e Posaçme kundër Korrupsionit dhe Krimit të Organizuar (SPAK) ka ashpërsuar akuzën ndaj dy ish-zyrtarëve të Agjencisë së Mbikëqyrjes Policore (AMP). Akuza e mëparshme për 'shpërdorim detyre' është zëvendësuar me atë të 'shtrëngimit me anë të kanosjes ose dhunës për dhënie pasurie', kryer në bashkëpunim. Sipas hetimeve, ish-zyrtarët dyshohet se kanë ushtruar presion ndaj biznesmenit A.B., me qëllim përfitimin pasuror dhe shmangien e kontrolleve tatimore për subjektin e tij.