Ibrahim Selimi, 41-vjeçar kosovar, dhe bashkëshortja e tij Fatlinda Selimi, 38-vjeçare, kanë parandaluar përhapjen e një zjarri në Qendrën e Kujdesit Roswitha në Pfäffikon të kantonit Schwyz në Zvicër. Ngjarja ndodhi të dielën rreth orës 15:30.
Çifti po punonte në zonë, duke pastruar borën pranë objektit, kur Selimi vuri re flakët në një ballkon. Fillimisht u përpoq ta shuante zjarrin me borë, por pa sukses. Më pas mori një zorrë uji nga automjeti i tij, ndërsa bashkëshortja hapi rubinetin dhe njoftoi policinë si dhe paralajmëroi stafin dhe banorët.
Zjarri u shua para mbërritjes së zjarrfikësve, sipas Policisë Kantonale të Schwyz-it. Dy gra, një e moshës 45 vjeç dhe tjetra 61 vjeç, u dërguan në spital për kontroll mjekësor për shkak të ekspozimit ndaj tymit. Nuk raportohen pasoja serioze.
Autoritetet kanë nisur hetimet për shkaqet e zjarrit, i cili dyshohet se u shkaktua nga një cigare e ndezur. Drejtuesi i shtëpisë pleqsh falënderoi çiftin Selimi për reagimin e shpejtë dhe veprimin e matur, duke thënë se u shmang një situatë më e rëndë.
Ibrahim Selimi, pronar i një kompanie mirëmbajtjeje prone, deklaroi për median Blick se "bëri vetëm atë që ishte e nevojshme" dhe nuk e quan veten hero.