Një ngjarje e rëndë ka ndodhur të dielën në mbrëmje në një piceri në Villmergen të kantonit Aargau në Zvicër, ku një shtetas shqiptar ka ndërhyrë për të mbrojtur vajzën e tij nga një grabitje me armë të ftohtë. Pronari i picerisë, Zelal Selimi, ndodhej jashtë lokalit kur vërejti se një person i maskuar po kërcënonte vajzën e tij brenda ambienteve të punës.
Sipas dëshmisë së dhënë për një televizion lokal, Selimi hyri në piceri dhe ndërhyri në momentin kur thika e grabitësit ndodhej vetëm 40 deri në 50 centimetra larg kokës së vajzës së tij. Gjatë përleshjes, ai arriti të kapte dorën e autorit, t’ia përdridhte krahun pas shpine dhe t’ia merrte thikën. Gjatë këtij konfrontimi, Selimi pësoi lëndime të lehta në të dyja duart.
Pas ndërhyrjes, autori u largua nga piceria me një skuter elektrik, ndërsa u ndoq nga Selimi. Pak çaste më vonë, personi u ndalua dhe u arrestua nga një polic që nuk ishte në detyrë në atë moment. Policia Kantonale e Aargaut konfirmoi se i dyshuari është një 36-vjeçar me shtetësi serbe, banues në rajon.
Autoritetet zvicerane po vijojnë hetimet për rastin. Aktualisht, policia po verifikon mundësinë e një lidhjeje midis kësaj ngjarjeje dhe një grabitjeje tjetër të armatosur të ndodhur pak ditë më parë në një furrë buke në të njëjtën zonë, ku gjithashtu ishte përdorur një thikë për të kërcënuar punonjësit.