Festimet luksoze të dasmës së këngëtares Dua Lipa dhe aktorit Callum Turner në Palermo kanë nxitur reagime dhe protesta nga banorët vendas. Eventi treditore ka përfshirë bllokimin e disa zonave publike, përfshirë Piazza Croce dei Vespri dhe Piazza Sant’Anna, duke shkaktuar vështirësi në lëvizjen e qytetarëve dhe aksesin në parkime.
Si formë pakënaqësie ndaj kufizimeve, banorët vendosën postera dhe grafite me mesazhe si “Palermo nuk është me qira” dhe “Sheshi ynë nuk është dhoma juaj e ndenjjes”. Autoritetet policore ndërhynë për të hequr disa prej këtyre pankartave.
Në një përpjekje për të zbutur tensionet, Dua Lipa ka vendosur të kompensojë me 5,000 paund (rreth 5,788 euro) banorët e apartamenteve me pamje nga zonat e bllokuara, si një shenjë falënderimi për tolerancën e tyre. Kostoja totale e organizimit mendohet se arrin në 1.5 milionë euro, ndërsa për sigurinë janë angazhuar mbi 50 truproja dhe është ndaluar përdorimi i dronëve.
Kryebashkiaku i Palermos, Roberto Lagalla, e ka mbështetur eventin, duke e konsideruar atë si një promovim të rëndësishëm ndërkombëtar që sjell përfitime ekonomike. Nga ana tjetër, banorët kanë kritikuar përdorimin e hapësirave publike për ceremoni private.
Çifti, të cilët janë martuar zyrtarisht në Londër fundjavën e kaluar, festuan në Sicili në praninë e emrave të njohur si Charli XCX, Troye Sivan, Mark Ronson dhe Donatella Versace.