Kandidati për deputet i AAK-së, Daut Haradinaj, ka publikuar dokumente zyrtare të nënshkruara nga ministri përkatës, duke pretenduar se Qeveria e Kosovës ka krijuar hapësirë ligjore për regjistrimin e qytetarëve që kanë pasur të dhëna në struktura paralele serbe.
Sipas dokumentacionit të cituar nga Haradinaj, vendimet në fjalë u lejojnë personave që kanë regjistruar faktet e gjendjes civile, si lindja, martesa apo vdekja në strukturat jolegale të Serbisë, t'i transferojnë këto të dhëna në Regjistrin Qendror të Gjendjes Civile të Republikës së Kosovës. Kjo mundësi vlen për periudhën kohore nga 10 qershori 1999 deri më 15 mars 2026.
Në reagimin e tij, Haradinaj ka shprehur qëndrim kritik ndaj këtij procesi, duke interpretuar se ky vendim mundëson marrjen e statusit të qytetarit të Republikës së Kosovës edhe për pjesëtarë të strukturave ilegale serbe dhe familjarët e tyre.