Unaza e Poshtme e Burrelit ka degraduar me shembje dhe fundosje në një pjesë të gjatë të saj. Kjo rrugë, e ndërtuar nga firma Ulza sh.p.k me një kosto 1.2 milionë euro, duhej të ishte në funksion prej të paktën 6 muajsh, por dëmtimet e mëparshme nuk janë rregulluar, duke çuar në përkeqësimin e gjendjes.
Rruga ka pësuar 4 shembje të mëdha, duke e bërë atë të pakalueshme. Pamjet tregojnë shembje dhe fundosje të dukshme në gjatësinë e rrugës.
Pak muaj më parë, Agjencia e Rregullimit, Mbikëqyrjes dhe Sigurimit të Infrastrukturës Rrugore (ARRSH) dërgoi një grup ekspertësh për të vlerësuar dëmin. Ekspertët kanë parashikuar ndërtimin e pilotave në një gjatësi 300 metra lineare si masë për riparimin e shembjeve.
Megjithatë, investimi për këto ndërhyrje ende nuk ka nisur. Kjo situatë bën që mjetet e tonazhit të rëndë të kalojnë ende përmes rrugëve të brendshme të qytetit të Burrelit.