Një tufë delfinësh ka ofruar pamje mahnitëse për turistët në Gjirin e Vlorës, teksa udhëtonin me gomone drejt ishullit të Sazanit dhe gadishullit të Karaburunit. Gjitarët detarë u afruan pranë mjeteve lundruese, duke notuar përpara tyre dhe duke luajtur mes dallgëve.
Lëvizjet dhe kërcimet e delfinëve u filmuan e u fotografuan nga vizitorët, të cilët mbetën të mrekulluar nga ky spektakël natyror. Sipas të dhënave, këto shfaqje po bëhen gjithnjë e më të zakonshme në ujërat e Gjirit të Vlorës, veçanërisht gjatë ditëve kur deti është i qetë dhe kushtet atmosferike janë të favorshme.
Prania e delfinëve konsiderohet si një vlerë e shtuar për turizmin në bregdetin e Vlorës, duke u dhuruar vizitorëve momente të veçanta dhe kujtime të paharrueshme gjatë ekskursioneve të tyre detare.