Gjykata në Xhenova ka dhënë verdiktin për përgjegjësit e shembjes së urës Morandi, e cila ndodhi më 14 gusht 2018 gjatë një stuhie shiu. Si pasojë e kësaj ngjarjeje, 43 persona humbën jetën pasi një pjesë e viaduktit u shemb, duke shkaktuar rënien e dhjetëra automjeteve.
Në procesin gjyqësor, që përfshiu 57 të pandehur, gjykata shpalli fajtorë 32 persona me dënime që variojnë nga 1 vit e 11 muaj deri në 12 vite burg. Ndër dënimet kryesore janë:
• Giovanni Castellucci, ish-drejtor ekzekutiv i Autostrade per l’Italia (Aspi): 12 vjet burg.
• Michele Donferri Mitelli, ish-zyrtar i lartë i Aspi: 11 vjet burg.
• Paolo Berti, ish-zëvendës i Castellucci: 5 vjet e gjysmë burg.
• Antonino Galatà, ish-drejtor ekzekutiv i Spea: 5 vjet e gjysmë burg.
• Mauro Coletta, ish-zyrtar i Ministrisë së Transportit: 5 vjet burg.
Prokuroria argumentoi se shembja ishte pasojë e neglizhencës, mungesës së mirëmbajtjes dhe injorimit të sinjaleve për gjendjen e strukturës me qëllim ruajtjen e fitimeve. Nga ana tjetër, mbrojtja pretendoi se tragjedia u shkaktua nga mangësi në projektimin fillestar dhe defekte në kabllot mbajtëse.
Familjarët e viktimave e pritën vendimin me emocione. Egle Possetti, zëdhënëse e familjarëve, deklaroi se vendimi kërkon kohë për t'u analizuar, ndërsa të tjerë e cilësuan dënimin si të pranueshëm. Pak para shpalljes së vendimit, drejtori aktual i Aspi, Arrigo Giana, kërkoi falje publike në emër të kompanisë.
Përditësime
Gjykata italiane ka shpallur dënime me total prej afro 200 vjetësh burg për 32 persona të përfshirë në shembjen e urës Morandi. Ish-drejtori i ASPI, Giovanni Castellucci, i cili aktualisht po vuan një dënim për një tjetër aksident fatal në autostradën A16 (2013), përballej me kërkesën e prokurorisë për 18 vjet e gjashtë muaj burg lidhur me këtë rast. Kompanitë ASPI dhe SPEA shmangën procesin penal pas një dëmshpërblimi prej 30 milionë eurosh. Ura e re, San Giorgio, e projektuar nga Renzo Piano, është funksionale që nga viti 2020.