Autoritetet gjyqësore britanike kanë shpallur dënimin ndaj Musa Qaushit, 20 vjeç, i cili u gjet duke kultivuar bimë narkotike në një banesë në Ivanhoe Crescent, Sunderland. I riu, i cili mbante rolin e "kopshtarit rezident", u kap në flagrancë nga policia duke u kujdesur për 351 bimë kanabisi, të shpërndara në katër dhoma të përshtatura për këtë aktivitet.
Sipas prokurorisë, droga e sekuestruar kap një vlerë prej 88,500 paund. Gjatë seancës në Gjykatën e Kurorës në Newcastle, gjyqtari Edward Bindloss vlerësoi se Qaushi ishte në dijeni të plotë të aktivitetit kriminal, duke rrëzuar pretendimet e mbrojtjes se roli i tij ishte i kufizuar dhe se ai ishte përfshirë vetëm pak ditë më parë.
Musa Qaushi është student në vitin e dytë në një universitet në Tiranë dhe nuk ka precedentë të mëparshëm penalë. Avokatja mbrojtëse, Mairi Clancy, deklaroi se klienti i saj është penduar. Pas përfundimit të dënimit me 20 muaj burg, autoritetet britanike pritet të nisin procedurat për dëbimin e tij nga vendi si person i dënuar për vepër penale.