Deputetja e zonës së Shkodrës, Marjana Koçeku, ka reaguar përmes rrjeteve sociale në lidhje me operacionin e zhvilluar një vit më parë nga Inspektorati Kombëtar i Mbrojtjes së Territorit (IMT) në Theth. Ky aksion, që kishte për qëllim prishjen e ndërtimeve pa leje, u cilësua nga deputetja si një ndër goditjet më të rënda emocionale në jetën e saj.
Në mesazhin e publikuar, Koçeku kërkoi falje për banorët e zonës, duke theksuar përkushtimin për t’i përfaqësuar ata në vijim. "I kërkoj falje prej zemre Thethit. Betohem se tash kam me ju përfaqësue si duhet", shprehet ajo. Deputetja ka shtuar gjithashtu se në atë periudhë ka përjetuar dhimbje të thellë, duke e krahasuar atë me humbjen e babait të saj.
Ky qëndrim vjen pas vendimit të saj për t'u larguar nga grupi parlamentar i Partisë Socialiste dhe për të vijuar detyrën si deputete e pavarur. Ndërkohë, Marjana Koçeku nuk ka marrë pjesë në seancën e fundit të punimeve në Kuvendin e Shqipërisë.