Deputetja Marjana Koçeku ka shprehur pendesë për mbështetjen publike që i dha aksionit të qeverisë për prishjen e ndërtimeve pa leje në Theth. Në një postim në rrjetet sociale, ajo i kërkoi falje prej zemre banorëve të zonës, duke e përshkruar atë periudhë si një ndër goditjet më të mëdha emocionale në jetën e saj.
"I kërkoj falje prej zemre Thethit. Ajo ngjarje ka qenë ndër goditjet më të mëdha emocionale që kam marrë në jetën time. Unë nuk qaj, por atë ditë kam qarë më shumë se kur më ka vdekur babai", shkruan Koçeku.
Ky qëndrim vjen pak kohë pas largimit të saj nga grupi parlamentar i Partisë Socialiste. Koçeku ka deklaruar se presioni dhe kritikat e qytetarëve lidhur me këtë aksion kanë qenë ndër arsyet e krisjes së raporteve të saj me partinë. Deputetja u zotua para banorëve se nuk do të lejojë më cenimin e zonës dhe se do të angazhohet për t'i përfaqësuar ata siç duhet në institucionet shtetërore.