Në mbledhjen e mbajtur të premten, Këshilli Gjyqësor i Kosovës (KGJK) dështoi të zgjedhë zëvendëskryesuesin e institucionit. Gjyqtari Artan Abazi, i cili ishte kandidati i vetëm për këtë pozitë, nuk arriti të marrë mbështetjen e nevojshme nga anëtarët e këshillit, duke marrë 5 vota pro dhe 6 vota kundër.
Para votimit, Artan Abazi paraqiti vizionin e tij, duke vënë theksin te uniteti institucional, kolegjialiteti dhe përgjegjësia e përbashkët. Ai u zotua se do të ushtrojë detyrën me përkushtim në forcimin e pavarësisë, integritetit dhe efikasitetit të sistemit gjyqësor të Republikës së Kosovës.
Pas numërimit, kryesuesi i KGJK-së, Rrustem Thaçi, konstatoi dështimin e procesit dhe bëri të ditur se konkursi do të rihapet. Thaçi shpjegoi se bazuar në udhëzimin administrativ, duhet të emërohet një komision ad hoc prej tre anëtarësh për të mbikëqyrur procedurën e re, duke përfshirë përfaqësues nga Departamenti për Çështje Ligjore dhe ai për Menaxhimin e Burimeve Njerëzore. Aktualisht, pozitën e zëvendëskryesuesit të KGJK-së e ushtron Arjeta Sadiku.