Mëngjesin e kësaj të shtune, zona e Triportit në Vlorë u vendos nën masa të rrepta sigurie për shkak të një proteste të paralajmëruar kundër projektit për vendosjen e TEC-eve lundruese. Policia e Shtetit angazhoi mbi 200 forca, duke përfshirë efektivë të rendit, Njësinë Shqiponja, Njësinë Delta dhe Forcat e Ndërhyrjes së Shpejtë (FNSH), të ardhura nga qytete si Tirana dhe Shkodra.
Organizatorët e protestës kishin kërkuar pezullimin e menjëhershëm të projektit dhe më shumë transparencë nga institucionet përkatëse. Ata shprehën gjithashtu kundërshtimin e tyre në lidhje me rrethimin e zonës së Triportit. Megjithatë, pjesëmarrja në këtë tubim ishte e kufizuar në rreth 10 qytetarë, duke bërë që protesta të përfundojë brenda pak minutash.
Situata në terren ka qenë e qetë dhe nuk është shënuar asnjë incident. Pas largimit të protestuesve, masat e shtuara të sigurisë dhe efektivët e policisë janë tërhequr nga zona.