Ngjarja e ndodhur në fund të shtatorit të vitit 2022 zë fill në një hotel në lindje të Londrës, ku Nertil Buzi u josh në një takim me pretekstin e zgjidhjes së një konflikti për shtëpi kanabisi. Sapo hyri në dhomë, ai u mbajt peng nga një grup kriminal, të cilët e lidhën me zinxhirë dhe e torturuan, duke përfshirë shkuljen e thonjve me pinca, për të detyruar familjen e tij në Shqipëri të paguante 400.000 stërlina.
Pas denoncimit të vëllait të pengut në Drejtorinë Vendore të Policisë së Fierit, u aktivizua bashkëpunimi ndërkombëtar. Operacioni u koordinua nga drejtuesit e Policisë së Shtetit, Pëllumb Seferi dhe Neritan Nallbati, me ndihmën e partnerëve britanikë. Skuadrat e Met Police dhe Agjencisë Kombëtare Kundër Krimit (NCA) arritën të lokalizojnë hotelin dhe të shpëtojnë Buzin përmes një ndërhyrjeje gjatë natës, ku u arrestuan disa persona të përfshirë.
Në procesin gjyqësor në Harrow Crown Court, prokuroria britanike hoqi dorë nga akuzat kryesore për pesë nga të pandehurit. I vetmi i dënuar ishte Nelid Arapi, me 16 muaj burg për posedim kanabisi me qëllim shitjeje. Rrëzimi i çështjes mendohet se erdhi si pasojë e tërheqjes së Buzit nga dëshmia ose frikës së prokurorisë se përfshirja e tij në aktivitete kriminale do ta diskreditonte atë si dëshmitar në gjykatë.
Kjo histori rierdhi në vëmendje pas ngjarjes tragjike të ndodhur në Roskovec, ku Nertil Buzi vrau prindërit e ish-të fejuarës së tij dhe më pas kreu vetëvrasje. Prindërit e Buzit pretendojnë se konfliktet financiare pas kthimit të tij nga Britania e Madhe kanë qenë shkak i përshkallëzimit të dhunës, duke pretenduar se një shumë e madhe parash që i përkiste djalit të tyre nuk i ishte kthyer nga familja e ish-partneres.
Përditësime
Hetimet e reja kanë zbardhur profilin e grupit kriminal me bazë në Manchester, të përbërë nga shtetas me origjinë nga Vlora, të specializuar në grabitjen e "shtëpive të barit", aktivitet i njohur në zhargonin e tyre si "bërja gol". Negocimi për lirimin e Nertil Buzit, i rrëmbyer në Londër në vitin 2022, u zhvillua në një hotel që shërbeu si zonë asnjanëse për palët.