Pas ngjarjes së rëndë të ndodhur mëngjesin e sotëm, prindërit e Nertil Buzit kanë bërë publike versionin e tyre mbi shkaqet që çuan në këtë përplasje tragjike. Sipas tyre, konflikti ka pasur natyrë financiare dhe lidhet me një shumë parash që 35-vjeçari kishte dërguar nga Anglia në llogarinë e ish-bashkëjetueses së tij gjatë kohës që ata bashkëjetonin.
Prindërit e autorit pretendojnë se, pas ndarjes së çiftit, djali i tyre kishte kërkuar vazhdimisht rikthimin e këtyre parave, por familja e 24-vjeçares nuk ka pranuar t’i kthente ato. Kjo mosmarrëveshje, sipas familjarëve të Nertil Buzit, ka qenë zanafilla e konfliktit që degradoi në vrasjen e ish-vjehrrit dhe plagosjen e ish-vjehrrës.
Në deklaratën e tyre, prindërit e 35-vjeçarit kanë shprehur keqardhje për humbjen e jetës së viktimës dhe i kanë bërë thirrje djalit të tyre që të dorëzohet pranë organeve të rendit për të shmangur përshkallëzimin e mëtejshëm të situatës. Autoritetet hetimore kanë bërë të ditur se këto pretendime mbeten ende të pakonfirmuara dhe janë pjesë e hetimit të nisur për zbardhjen e plotë të rrethanave të këtij krimi.