Dy persona kanë rënë pre e dhunës fizike gjatë orëve të mbrëmjes së të shtunës në Sarandë. Ngjarja ka ndodhur në lagjen nr. 4 të qytetit dhe është pasuar nga dëmtimi me sende të forta i një automjeti, i cili rezulton të jetë në pronësi të të dhunuarve.
Sipas të dhënave paraprake, konflikti ka ndodhur për motive të dobëta. Menjëherë pas njoftimit, në vendngjarje kanë mbërritur efektivët e Policisë së Sarandës të mbështetur nga forcat e FNSH-së.
Autoritetet kanë ndërmarrë veprimet e para hetimore, duke shoqëruar disa persona për sqarimin e shkaqeve dhe rrethanave të incidentit. Aktualisht nuk ka detaje të tjera lidhur me ngjarjen apo gjendjen shëndetësore të personave të përfshirë.