Në gjashtëmujorin e parë të vitit 2026, Kosova ka shënuar shtim të numrit të bizneseve të regjistruara. Sipas të dhënave zyrtare të Agjencisë për Regjistrimin e Bizneseve të Kosovës (ARBK), nga 1 janari deri më 29 qershor 2026 janë hapur gjithsej 6,834 biznese të reja, duke shënuar një rritje prej 289 ndërmarrjesh krahasuar me të njëjtën periudhë të vitit 2025, kur ishin regjistruar 6,545 të tilla.
Në anën tjetër, raporti i Agjencisë së Statistikave të Kosovës (ASK) për muajin maj 2026 tregon një tendencë të ndryshme për këtë periudhë. Gjatë muajit maj janë regjistruar 1,108 ndërmarrje, duke shënuar rënie prej 1.4% krahasuar me muajin prill dhe rënie prej 16.9% në krahasim me majin e vitit 2025.
Struktura e bizneseve për muajin maj tregon mbizotërim të ndërmarrjeve të vogla:
• 1,101 ndërmarrje janë mikro-ndërmarrje (0-9 të punësuar).
• 7 ndërmarrje janë ndërmarrje të vogla (10-49 të punësuar).
• Nuk është regjistruar asnjë ndërmarrje e mesme apo e madhe.
Sektori i tregtisë (shumicë dhe pakicë) dhe riparimi i mjeteve motorike mbetet aktiviteti ekonomik më i preferuar me 25.1% të regjistrimeve. Pas tij renditen:
• Shërbimet e akomodimit dhe ushqimit (11.4%)
• Ndërtimtaria (10.7%)
• Prodhimi (9.5%)
Sa i përket shpërndarjes gjeografike, Rajoni i Prishtinës prin me 523 ndërmarrje të reja, i ndjekur nga Prizreni (130), Ferizaj (110), Mitrovica (100), Gjilani (86), Gjakova (83) dhe Peja (76).