21 kadetë përfunduan me sukses trajnimin profesional për zjarrfikës dhe u diplomuan më 22 janar 2026 në Akademinë e Kosovës për Siguri Publike në Vushtrri.
Trajnimi zgjati 20 javë dhe u nda në 9 module, duke ofruar kadetëve njohuri të avancuara dhe aftësi konkrete për reagim të shpejtë dhe efikas në situata emergjente, parandalim dhe menaxhim zjarresh, si dhe ndërhyrje profesionale për mbrojtje të jetës njerëzore, pronës dhe mjedisit.
Në ceremoni morën pjesë ministri në detyrë i Punëve të Brendshme Xhelal Sveçla dhe sekretari i përgjithshëm i Ministrisë Genc Metaj. Ministri Sveçla falënderoi instruktorët dhe trajnerët për kontributin në formimin profesional të kadetëve, si dhe partnerët ndërkombëtarë që mbështetën projektin.
Ministria e Punëve të Brendshme theksoi përkushtimin për të vazhduar investimet në zhvillimin e kapaciteteve njerëzore dhe teknike të shërbimit të zjarrfikësve, duke kontribuar kështu në sigurinë e vendit dhe qytetarëve.