Protesta qytetare ka hyrë në ditën e saj të 12-të. Tubimi nisi me mbledhjen e protestuesve në sheshin “Skënderbej”, të cilët marshuan drejt godinës së Kryeministrisë, ku u stacionuan për të mbajtur fjalimet e radhës. Gjatë marshimit, pjesëmarrësit mbajtën pankarta në duar dhe brohoritën slogane si “Nuk i ke larë hesapet me studentët” dhe “Pa rini nuk ka Shqipëri”.
Kërkesat e protestuesve mbeten të pandryshuara dhe përfshijnë:
• Dorëheqjen e qeverisë;
• Shfuqizimin e statusit dhe kuadrit ligjor për investitorët strategjikë;
• Shfuqizimin e Paketës së Maleve;
• Anulimin e ndryshimeve në Ligjin për Zonat e Mbrojtura;
• Anulimin e ndryshimeve në Ligjin për Trashëgiminë Kulturore.
Pas tubimit para institucionit të Kryeministrisë, protestuesit pritet të vazhdojnë marshimin e tyre të përhershëm nëpër rrugët e kryeqytetit.