Dogana në Stuttgart ka sekuestruar 252.8 kilogramë produkte mishi dhe suxhuk në një autobus udhëtimi që vinte nga Kosova. Ngjarja ndodhi të dielën në mëngjes, në terminalin e autobusëve të Aeroportit të Stuttgartit, në Gjermani. Zyrtarët doganorë shënjestruan automjetin për kontroll të detajuar pas një ere të fortë që vinte nga çantat në zonën e bagazheve.
Përveç produkteve të mishit, të cilat nuk lejohen për import nga vendet jashtë Bashkimit Evropian për arsye veterinare, u sekuestruan edhe:
• 700 pako cigare të kontrabanduara;
• Katër dritare alumini me grila, me vlerë rreth 720 euro;
• Një kuzhinë, me vlerë rreth 400 euro;
• Një kondicioner, me vlerë rreth 640 euro.
Gjithashtu, në autobus u gjet një këlysh qeni i racës Maltipoo, rreth pesë muajsh, me vlerë prej 2.000-2.200 euro. Kafsha dyshohet se nuk kishte vaksinën e nevojshme kundër tërbimit dhe u dërgua në karantinë në një strehimore kafshësh, për shkak të dyshimit për import komercial.
Autoritetet kanë nisur procedura penale tatimore ndaj dy shoferëve të autobusit dhe një personi që mblidhte mallrat në stacion, për evazion fiskal dhe kontrabandë gjatë importit. Shoferët përballen gjithashtu me gjobë nga Zyra e Qarkut Esslingen për futjen e paligjshme të produkteve të mishit.
Dogana thekson se rregullat e rrepta veterinare synojnë parandalimin e sëmundjeve të kafshëve nga shtetet jashtë BE-së. Vitin e kaluar, në Aeroportin e Stuttgartit u sekuestruan dhe asgjësuan rreth 4-4.2 ton ushqime të paimportueshme.