Gjatë kontrolleve të ushtruara në Pikën e Kalimit Kufitar të Kakavijës, autoritetet policore kanë goditur dy raste të kontrabandës me mallra. Sasia e produkteve të sekuestruara u gjet në dy autobusë të linjave ndërkombëtare që vinin nga Athinë.
Në rastin e parë, në autobusin e linjës Athinë-Gjirokastër, u zbuluan 685 kilogramë mish viçi, të prerë në formën e bërxollave. Për këtë ngjarje, drejtuesi i mjetit, shtetasi A.B., 54 vjeç, banues në Gjirokastër, u arrestua në flagrancë nga shërbimet e Policisë Kufitare.
Rasti i dytë u evidentua në autobusin e linjës Athinë-Shkodër, ku u gjetën katër kuti kartoni që përmbanin 82 kilogramë e 900 gramë peshk. Në lidhje me këtë rast, drejtuesi i autobusit, shtetasi D.M., 46 vjeç, banues në Elbasan, do të procedohet penalisht në gjendje të lirë.
Të dyja rastet janë referuar për hetime të mëtejshme pranë organeve kompetente për veprën penale “Kontrabanda me mallra të tjerë”, parashikuar nga neni 174 i Kodit Penal. Sasia e produkteve ushqimore të sekuestruara është vënë në dispozicion si provë materiale.
Përditësime
Policia e Shtetit finalizoi operacionin e koduar 'Ngarkesat', në bashkëpunim me Autoritetin Kombëtar të Ushqimit (AKU) në Gjirokastër. Hetimet çuan në arrestimin e shtetasit D.M., 46 vjeç, banues në Tiranë, i cili më parë ishte raportuar se po ndiqej në gjendje të lirë. Autoritetet shtuan ndaj të arrestuarve edhe akuzën për 'Importimi, prodhimi, shitja dhe ruajtja e ushqimeve të rrezikshme për shëndetin', krahas asaj për kontrabandë.