Draft-udhëzim i MD-së ngre shqetësime për privatësinë dhe ndarjen e pushteteve

Një draft-udhëzim administrativ i Ministrisë së Drejtësisë (MD) të Kosovës, i publikuar kohët e fundit, parashikon zgjerimin e qasjes së kësaj ministrie në Sistemin e Evidencës Penale, duke ngritur shqetësime nga institucione të ndryshme.

Instituti i Kosovës për Drejtësi (IKD), Këshilli Gjyqësor i Kosovës (KGJK) dhe Agjencia për Informim dhe Privatësi (AIP) kanë shprehur rezerva të mëdha. Këto institucione paralajmërojnë se masa mund të cënojë privatësinë, të shkelë ligjet vendore dhe standardet ndërkombëtare për mbrojtjen e të dhënave personale, si dhe të rrezikojë ndarjen e pushteteve dhe politizimin e informacioneve të ndjeshme.

Ministria e Drejtësisë nuk ka kthyer përgjigje ndaj kërkesave për koment nga Radio Evropa e Lirë.

Çfarë parasheh draft-udhëzimi?

Draft-udhëzimi parashikon se MD mund të tërheqë të dhëna nga Sistemi i Evidencës Penale, të krijojë kopje të tyre, të përpunojë të dhëna individuale dhe masive, të përdorë të dhënat për analiza dhe statistika, si dhe të ruajë regjistra të qasjes për periudha të gjata, deri edhe përgjithmonë në rast të qasjes masive.

Neni 4 i draft-it përcakton se MD ka qasje të plotë në sistem, pa të drejtë për ndërhyrje apo intervenime, ndërsa ministri cakton me vendim zyrtarin përgjegjës për qasje.

Kritikat për qasje të pakufizuar

Sipas analizës së IKD-së, ky draft i jep Ministrisë së Drejtësisë kompetenca më të gjera se ato të parashikuara nga Ligji për Sistemin Qendror të Evidencës Penale. "Ky draft i jep Ministrisë qasje të plotë në Sistemin e Evidencës Penale – duke përfshirë marrjen e dosjeve, kopjimin dhe përpunimin masiv të të dhënave – kompetenca që nuk ia njeh ligji", deklaroi Gëzim Shala nga ky institut.

Sistemi i Evidencës Penale është databaza që përmban të dhëna mbi dënimet penale të qytetarëve.