Drejtori i Autoritetit Kombëtar të Ushqimit në Shkodër, Ramir Haderi, është sulmuar mbrëmjen e 21 majit ndërsa ndodhej në lagjen “Fahri Ramadani” të qytetit.
Sipas njoftimit të Policisë së Shkodrës, viktima është paraqitur rreth orës 21:30 në Spitalin Rajonal Shkodër për ndihmë mjekësore dhe ka deklaruar se është goditur me sende të forta nga një shtetas ende i paidentifikuar.
Grupi hetimor, nën drejtimin e Prokurorisë, po vijon punën për sqarimin e rrethanave të ngjarjes dhe për identifikimin e autorit.
Përditësime
Burime të pakonfirmuara thanë se drejtori i AKU-së në Shkodër është jashtë rrezikut për jetën pasi pësoi plagë në kokë dhe trup. Sulmi ndodhi pranë lagjes ‘Rus’ ose ‘8-katëshi’, krahas lagjes “Fahri Ramadani”.
Haderi tha se po fliste në telefon kur një person doli nga një rrugicë dhe e goditi. Ai pësoi dëmtim në vetull dhe u largua pas mjekimit. "Nuk kam konflikte me njeri", deklaroi Haderi. Hetuesit po shqyrtojnë lidhjen e sulmit me detyrën e tij, përfshirë kontrollin e marsit për 95 tonë misër me aflatoksinë. Sekuestrimi i kamerave vazhdon edhe mëngjesin e sotëm.