Një ngjarje ku u plagosën dy persona me thikë u regjistrua në zonën Ishull-Lezhë të Lezhës. Një i ri i goditi ata pas një konflikti, duke u shkaktuar dëmtime.
Të plagosurit u transportuan menjëherë në Spitalin Rajonal të Lezhës, ku morën ndihmën mjekësore të nevojshme dhe ndodhen jashtë rrezikut për jetën.
Policia ndërhyri shpejt në vendngjarje, duke arrestuar në flagrancë autorin e dyshuar. Ai u shoqërua në Komisariatin e Policisë Lezhë për veprime të mëtejshme procedurale.
Si provë materiale u sekuestrua thika e përdorur në ngjarje. Hetimet vazhdojnë për zbardhjen e plotë të rrethanave.
Përditësime
Policia e Lezhës ka konfirmuar detajet e ngjarjes në një berberhane në Ishull Lezhë. Autori D. K., 40 vjeç, sulmoi me thikë R. Sh., 24 vjeç (pronari), dhe A. Z., 52 vjeç (klient), duke i lënduar në dorë. B. D., 35 vjeç (daja i pronarit), u përfshi në konflikt, por nuk u plagos. Motivet janë të dobëta. Të plagosurit u trajtuan në spital dhe kanë bërë kallëzim penal.
Njerka e D.K. kishte bërë më parë denoncim për dhunë fizike dhe psikologjike ndaj saj. Policia e Lezhës konfirmoi arrestimin e D.K. si autor i dyshuar për plagosjen me thikë të dy personave. "Të dy të plagosurit kanë marrë plagë të lehta prerëse në gjymtyrë nga arma e ftohtë dhe janë jashtë rrezikut për jetën," thuhet në njoftimin zyrtar të policisë.