Një aksident i rëndë në punë ka ndodhur në një kantier ndërtimi, ku po ndërtohet një spital privat pranë Bezhigradit në Slloveni. Dy punonjës, të cilët sipas raportimeve janë shtetas të Kosovës nga komuna e Mamushës, kanë marrë lëndime të rënda trupore.
Sipas informacioneve të bëra të ditura nga mediat sllovene, ngjarja ka ndodhur gjatë procesit të lëvizjes së materialeve të ndërtimit me vinç. Gjatë këtij operacioni, disa rrjeta të rënda armature kanë rënë mbi dy punëtorët, duke shkaktuar plagosjen e tyre të rëndë. Pas ndihmës së parë, të lënduarit janë dërguar me urgjencë në Qendrën Klinike Universitare të Lubjanës (UKC Ljubljana) për trajtim të specializuar mjekësor. Gjendja e tyre shëndetësore paraqitet e rëndë dhe jeta e tyre raportohet të jetë në rrezik.
Policia sllovene ka nisur hetimet për të zbardhur në detaje rrethanat e këtij aksidenti. Zyrtarët po shqyrtojnë gjithashtu nëse janë zbatuar të gjitha masat e duhura të sigurisë në vendin e punës në momentin kur ka ndodhur ngjarja.