Ngjarja e rëndë ka ndodhur gjatë punimeve në një kantier në Rrugën A të kryeqytetit, ku rrëzimi i një pajisjeje të rëndë (kran) ka shkaktuar pasoja tragjike për dy punëtorë. Sipas njoftimeve zyrtare, njëri prej punëtorëve ka ndërruar jetë si pasojë e dëmtimeve të marra, pavarësisht përpjekjeve të personelit mjekësor në Qendrën Emergjente për ta mbajtur atë në jetë.
Punëtori i dytë, i cili gjithashtu u dërgua me urgjencë në spital për të marrë trajtimin e nevojshëm, ndodhet aktualisht nën kujdesin e vazhdueshëm të stafit mjekësor. Drejtori i Qendrës Emergjente, Naser Syla, ka bërë të ditur për mediat se pacienti ka pësuar lëndime të rënda trupore, por se situata e tij shëndetësore është stabilizuar.
Pas ofrimit të ndihmës së parë dhe stabilizimit të gjendjes, është vendosur që pacienti i mbijetuar të vazhdojë trajtimin e mëtejshëm mjekësor në Klinikën e Kirurgjisë Torakale brenda qendrës spitalore QKUK.
Përditësime
Sipas burimeve mjekësore, viktima e aksidentit ka lindur në vitin 2008, ndërsa punëtori tjetër i mbijetuar është i vitlindjes 2000. Pavarësisht përpjekjeve intensive të ekipeve të QKUK-së për reanimim për rreth 2 orë, i riu nuk u ka mbijetuar lëndimeve.