Dy sulme të armatosura në Afrikën e Jugut lënë 27 të vrarë

Një fundjavë e përgjakshme ka lënë të paktën 27 persona të vrarë në dy incidente të ndara me armë zjarri në Afrikën e Jugut. Sulmi i parë ndodhi të shtunën rreth orës 21:30 në një tavernë në zonën e Wedela-s, në jugperëndim të Johanesburgut. Sipas Policisë së Afrikës së Jugut, tetë persona të armatosur me pushkë AK-47 dhe pistoleta hapën zjarr ndaj klientëve që ndodheshin jashtë lokalit, përpara se të hynin brenda dhe të vazhdonin të shtënat. Nga ky sulm humbën jetën 17 persona, konkretisht 13 burra dhe katër gra, ndërsa 15 të tjerë mbetën të plagosur. Pas ekzekutimeve, autorët u vunë flakën dy automjeteve përpara se të largoheshin nga vendi i ngjarjes.

Komisioneri i Policisë së Gautengut, gjenerallejtënant Tommy Mthombeni, deklaroi se mes viktimave në Wedela ka shtetas me origjinë nga Etiopia dhe Lesoto. Autoritetet po hetojnë mundësinë që sulmi të jetë i lidhur me përplasjet për kontrollin e territorit midis grupeve të përfshira në aktivitetin e paligjshëm minerar. Gjithashtu, policia dyshon se grabitja e sendeve personale të viktimave mund të jetë një nga motivet kryesore të këtij sulmi të organizuar.

Në orët e para të së dielës, një tjetër sulm me armë ndodhi në një dyqan në Lwandle, pranë Cape Town. Si pasojë e këtij incidenti, humbën jetën të paktën 10 persona, ndërsa 11 të tjerë mbetën të plagosur. Autoritetet bënë të ditur se pesë prej viktimave humbën jetën në vendin e ngjarjes, ndërsa pesë të tjerë ndërruan jetë më vonë në spital si pasojë e plagëve të marra.

Policia ka nisur operacione kërkimi për autorët në të dyja zonat, por deri më tani nuk është raportuar asnjë arrestim. Këto incidente të rënda pasojnë një sulm tjetër me armë të ndodhur pak ditë më parë në një festë në një shtëpi pranë Durbanit, ku mbetën të vrarë 11 persona, përfshirë një grua shtatzënë.