Dy vatra zjarri janë regjistruar gjatë orëve të fundit në territorin e Bashkisë së Prrenjasit, përkatësisht në fshatin Skënderbe të Njësisë Administrative Rrajcë dhe në Njësinë Administrative Qukës. Temperaturat e larta që kanë përfshirë zonën kanë favorizuar përhapjen e flakëve, duke rritur rrezikun për sipërfaqet përreth.
Reagimi i menjëhershëm i forcave të Shërbimit të Mbrojtjes nga Zjarri dhe Shpëtimit (MZSH), në bashkëpunim me Policinë e Shtetit dhe banorët e zonave të prekura, bëri të mundur izolimin dhe shuarjen e plotë të vatrave përpara se flakët të afroheshin pranë banesave. Sipas të dhënave zyrtare, nuk raportohet për dëme në njerëz apo shtëpi, përveç dëmeve materiale në bimësi.
Në lidhje me këtë ngjarje, Bashkia e Prrenjasit ka përsëritur apelin drejtuar qytetarëve për të treguar kujdes maksimal. Autoritetet kërkojnë shmangien e ndezjes së zjarreve në natyrë, moshedhjen e materialeve të ndezshme apo bishtave të cigareve në hapësira të hapura, si dhe njoftimin e menjëhershëm të forcave të rendit e të zjarrfikëseve për çdo vatër të konstatuar.