Kryeministri Edi Rama ka uruar Ditën Ndërkombëtare të Grave dhe Vajzave në Shkencë më 11 shkurt, përmes një postimi në rrjetet sociale. Në mesazhin e tij në Facebook, ai vlerësoi angazhimin e vajzave të reja në fushën e dijes dhe inovacionit.
Ai solli si shembull frymëzues nxënëset e gjimnazit Dhaskal Todri në Elbasan, të cilat po përgatiten për Festivalin e Shkencës. Kjo nismë zhvillohet për herë të parë në shkollat shqiptare dhe mbështetet nga një grua e suksesshme, e angazhuar në kërkimin dhe prodhimin e produkteve medicinale dhe kozmetike bio-organike.
Dita Ndërkombëtare e Grave dhe Vajzave në Shkencë promovon pjesëmarrjen e tyre të barabartë në fushat e shkencës, teknologjisë, inxhinierisë dhe matematikës. Nisma është nisur në vitin 2015 nga Kombet e Bashkuara për të vënë në pah rolin e grave dhe vajzave në fushat shkencore, me qëllim frymëzimin dhe përmirësimin e barazisë gjinore në ekosistemin shkencor.
Postimi i kryeministrit përfshin fjalët: "Mirëmëngjes dhe në Ditën Ndërkombëtare të Grave dhe Vajzave në Shkencë, me shembullin frymëzues të nxënëseve të gjimnazit Dhaskal Todri që po përgatiten për Festivalin e Shkencës, një nismë e cila zhvillohet për herë të parë në shkollat tona, të mbështetura nga një tjetër grua e suksesshme në kërkimin dhe prodhimin e produkteve medicinale e kozmetike bio-organike, ju uroj një ditë të mbarë!".