Edicioni i katërt i Automotive Fair Albania u çel mbrëmjen e së enjtes në sheshin Nënë Tereza në Tiranë. Aktiviteti do të vazhdojë deri të dielën dhe sjell ekspozita makinash retro, motorë të veçantë dhe automjete elektrike.
Organizatorët kanë parashikuar gara Go Kart për fëmijë, demonstrime aftësish dhe shfaqjen Stunt Street Show, e cila zhvillohet për herë të parë në vend. Eventi synon të promovojë industrinë automotive, teknologjinë dhe kulturën e sigurisë rrugore.
Në ceremoninë e hapjes morën pjesë zëvendëskryeministrja Albana Koçiu, drejtoresha e Promovimit në Bashkinë e Tiranës Iva Beharaj dhe drejtori i përgjithshëm i Drejtorisë së Shërbimeve të Transportit Rrugor Kreshnik Bajraktari. Koçiu theksoi bashkëpunimin institucional dhe standardet europiane.
Aktiviteti organizohet nga DPSHTRR dhe Auto Club Albania. Përveç ekspozitave dhe garave, programi përfshin koncerte dhe aktivitete edukative për sigurinë në qarkullim.