Interpol Tirana ka finalizuar një tjetër fazë të operacionit ndërkombëtar The Wanted, duke realizuar ekstradimin nga Gjermania drejt Shqipërisë të shtetasit Eltion Logu, 35 vjeç, të lindur në Tropojë.
Ai ishte shpallur në kërkim ndërkombëtar për veprën penale të mashtrimit kompjuterik, të kryer në kuadër të një grupi të strukturuar kriminal.
Sipas hetimeve, Logu së bashku me persona të tjerë kanë operuar përmes një call center-i të zbuluar në 2024, ku kanë kryer 17 raste dhe tentativa mashtrimi.
Këto veprime kanë shkaktuar një dëm ekonomik prej rreth 187 mijë euro ndaj qytetarëve.
Në korrik 2025, Gjykata e Posaçme e Shkallës së Parë për Korrupsionin dhe Krimin e Organizuar (GJKKO) i ka caktuar Logut masën e sigurisë arrest në burg.
Ekstradimi u bë i mundur falë bashkëpunimit mes specialistëve të Drejtorisë së Interpolit në Tiranë dhe homologëve të Interpol Wiesbaden në Gjermani.
Përditësime
Qindra qytetarë gjermanë ranë viktimë e mashtrimit nga një call center i paligjshëm në Tiranë. Mashtruesit telefononin duke u paraqitur si oficerë policie për rikuperimin e parave nga investime në Forex dhe Crypto.
Anëtarë të tjerë të grupit:
- Arrest me burg: Emiljano Sejdillari, Tafil Dyrmishi, Sokol Krasniqi, Rodrigo Guga;
- Arrest shtëpie: Lisjane Çulani, Mateo Llozhi, Kejdi Nuka;
- Një person tjetër në kërkim.