Si rezultat i bashkëpunimit ndërmjet Interpol Tiranës dhe autoriteteve ligjzbatuese në Itali, u finalizua ekstradimi nga Roma drejt vendit tonë i shtetasit Sefer Selimaj. 42-vjeçari, i lindur në Tiranë, ishte shpallur në kërkim ndërkombëtar për t'iu përgjigjur vendimit penal të formës së prerë të dhënë nga drejtësia shqiptare.
Sipas njoftimit zyrtar, Gjykata e Shkallës së Parë për Krimet e Rënda kishte shpallur dënimin prej 15 vitesh burgim për Selimajn në vitin 2017. Ai është gjetur fajtor për kryerjen e veprës penale "Trafikim i personave të rritur", të kryer në bashkëpunim. Pas përfundimit të procedurave administrative dhe ligjore në territorin italian, i dënuari iu dorëzua autoriteteve policore shqiptare në aeroportin e Rinasit, me qëllim vijimin e procedurave për ekzekutimin e dënimit të mbetur.