Influenceri brazilian Evandro Luiz Prudente, 33 vjeç, u ekzekutua brenda ambienteve të një palestre në São Paulo. Ngjarja u regjistrua nga kamerat e sigurisë, të cilat shfaqin një person të veshur me rroba të zeza dhe doreza, i cili hyn në palestër dhe qëllon për vdekje viktimën në sallën e pritjes. Pas sulmit, autori u largua me ndihmën e një bashkëpunëtori me motoçikletë, e cila më vonë u gjet e braktisur pranë vendit të ngjarjes.
Sipas hetimeve paraprake, policia ka gjetur 16 gëzhoja në vendin ku ndodhi vrasja. Evandro Luiz Prudente, me origjinë nga Porto Alegre, njihej në rrjetet sociale si “Sheiku i Basteve” për shkak të përfshirjes në bastet sportive, ndërsa merrej edhe me tregtimin e automjeteve në internet. Hetuesit po shqyrtojnë mundësinë që viktima të ketë qenë i përfshirë në veprimtari të paligjshme, duke përfshirë fajdenë.
Autoritetet kanë ndaluar 3 të dyshuar në shtetin e Rio de Janeiros, megjithëse deri më tani nuk janë gjetur armë në zotërim të tyre. Sipas të dhënave, Prudente ishte zhvendosur në São Paulo pas kërcënimeve të marra në Rio Grande do Sul, duke qenë se kishte precedentë penalë për vrasje dhe trafik droge. Nga ana tjetër, bashkëshortja e 33-vjeçarit ka deklaruar se, në dijeni të saj, ai nuk kishte marrë kërcënime kohët e fundit. Policia vijon hetimet për të zbardhur itinerarin e autorëve dhe motivet e sakta të këtij atentati.