Mark Prenga, 27 vjeç, elektrist i OSHEE-së, humbi jetën të enjten në mëngjes në fshatin Rrilë të Lezhës, gjatë riparimit të një defekti në një shtyllë elektrike pranë nënstacionit.
Dyshohet se vdekja ka ardhur si pasojë e kontaktit me rrymën elektrike dhe mosrespektimit të protokolleve të sigurisë. Njoftimi i policisë konfirmon se ngjarja u bë publike një ditë më parë.
Në vijim të veprimeve procedurale nga oficerët e Policisë Gjyqësore të Prokurorisë së Lezhës, ka nisur procedimi penal për veprat penale “Shkelja e rregullave të mbrojtjes në punë” dhe “Shpërdorimi i detyrës”.
Procedimi është ngritur ndaj:
• M. L., 34 vjeç, inxhinier elektrik i OSHEE-së;
• K. Ll., 60 vjeç, elektrist i OSHEE-së;
• A. Xh., 62 vjeç, elektrist i OSHEE-së;
• E. R., 23 vjeç, elektrist i OSHEE-së.
Drejtoria Vendore e Policisë Lezhë bën të ditur se hetimet vijojnë për të sqaruar rrethanat dhe për të përcaktuar përgjegjësitë ligjore. Materialet janë dërguar në Prokurorinë e Lezhës për veprime të mëtejshme.