Një ngjarje e rëndë është regjistruar në orët e para të mëngjesit të sotëm në Himarë, ku një punonjës i Operatorit të Shpërndarjes së Energjisë Elektrike (OSHEE) ka humbur jetën gjatë kryerjes së detyrës. Viktima është Bashkim Boçi, 55 vjeç nga Elbasani, i cili ishte dërguar si pjesë e grupeve mbështetëse për të asistuar ekipet lokale në riparimin e defekteve në rrjetin elektrik, të shkaktuara nga moti i keq dhe erërat e forta.
Sipas informacioneve, ngjarja ka ndodhur rreth orës 03:00. Ndërsa po zhvillohej ndërhyrja teknike, punonjësi ka pësuar një incident fatal. Sipas të dhënave, viktima ka qenë i ngjitur në një shtyllë elektrike në një lartësi prej 9 metrash, kur i është shkëputur rripi i sigurimit, duke sjellë rënien e tij. Paralelisht, autoritetet po hetojnë edhe dyshimet se punonjësi mund të ketë rënë në kontakt me rrymën elektrike gjatë përpjekjes për të rilidhur kabullin.
Grupi hetimor ka mbërritur në vendngjarje dhe po kryen veprimet procedurale për dokumentimin e rastit. Përcaktimi përfundimtar i shkakut të vdekjes pritet të dalë pas përfundimit të hetimeve dhe ekspertizës teknike të autoriteteve kompetente.
Përditësime
Një punonjës sezonal i OSHEE-së ka humbur jetën gjatë riparimit të një defekti elektrik në zonën e Potamit, në Himarë. Sipas autoriteteve, viktima mbërriti pa shenja jete në qendrën shëndetësore rreth orës 03:40. Stuhia që përfshiu zonën shkaktoi gjithashtu të lënduar të tjerë, pasi një pemë u rrëzua brenda ambienteve të stadiumit lokal.